Aajege maahta åarjelsaemien ööhpehtimmiem learoehkidie jåarhkeskuvlesne faaledh, dovne klaassetjïehtjelisnie jïh maajeööhpehtimmesne. Maehtebe aaj aalkoekuvsjh geervealmetjidie faaledh Saemien jïlleskuvline ektine. Ovmessie gïeledaltesidie ööhpehtibie.
Åarjelsaemien ööhpehtimmiem jåarhkeskuvledaltesisnie faalebe.
Ööhpehtimmiem maehtebe faaledh ovmessie gïeledaltesinie; saemien 1. gïeline jïh saemien 2. gïeline (saemien 2, 3, 4). Ööhpehtimmiem vedtebe sïejhme lïerehtimmine Rørosen jåarhkeskuvlesne mesnie lohkehtæjja klaassetjïehtjelisnie, jallh maajeööhpehtimmine datovri jallh videjokonferaansi tjïrrh jeatjah skuvlide.
Daarpoej mietie maehtebe ööhpehtimmiem programmefaagine Vg2 Båatsoe jïh Vg2 Duedtie öörnedh jïh tjïrrehtidh Rørosen jåarhkeskuvline aktine.
Åarjelsaemien aalkoeööhpehtimmiem geerve almetjidie faalebe Saemien jolleskuvline aktine ovmessie daltesinie: «Åarjelsaemiengïele fïerhten biejjien jieliemisnie – aalkoeööhpehtimmie 1», 15 studijepoengh, «Åarjelsaemiengïele fïerhten biejjien jieliemisnie – aalkoeööhpehtimmie 2», 15 studijepoengh jïh «Åarjelsaemien bieliejaepielohkeme», 30 studijepoengh. Daejtie lohkemidie tjïrrehtibie daarpoej mietie, jïh jis doedtevierhtieh åadtjobe jïh nuekies studeenth gååvnesieh.
Mijjieh sïjhtebe saemien gïele- jïh kultuvre-tjåanghkoesijjieh öörnedh. Daate vihkeles barkoeh mijjen luvnie. Gïeletjåanghkojne edtja åarjelsaemien gïele govledh, vååjnedh jïh åtnasovvedh. Tjåanghkoeh aamhtesi mietie, jïh dejnie ovmessie gïele- jïh kultuvredarjomh. Tjåanghkoesijjieh jïh gïelearenah ovmessie aalteredåehkide öörnebe.
Gadtsegarhkh saemien gïelearena maanide Rørosen dajvesne. Tjåanghkoem iehkedsbiejjien utnebe akten aejkien fïerhten asken. Daesnie maanah beapmoem åadtjoeh, saemiestidh, tjåanghkoem jïh kultuvreles darjoeminie dåeriedieh.
Fueriegadtjh saemien gïelearena noeride Rørosen dajvesne. Tjåanghkoem iehkedsbiejjien utnebe akten aejkien fïerhten asken. Daesnie maanah beapmoem åadtjoeh, saemiestieh, tjåanghkoem jïh kultuvreles darjoeminie dåeriedieh.
Aajege saemien tjåanghkoesijjieh jïh öörnemh öörnie, jïjtje jallh jeatjebigujmie ektine. Vihkeles öörnemh mah leah fïerhten jallh fïerhten mubpien jaepien leah Saemiej åålmegebiejjie, Raasten rastah jïh healsoeseminaare. Dïsse lissine jeatjah tjåanghkoesijjieh öörnebe daarpoej mietie – dovne seminaarh, teemabiejjieh jïh tjåanghkoe.
Aajege Saemien Jïlleskuvline ektine soejkesjieh åarjelsaemien aalkoekuvsje 1. boelhke, 15 studijepoengh, geerve almetjidie tjaktjen 2022. Daate lohkeme gaajhkide mah sijhtieh åarjelsaemien lïeredh.
Aajege Saemien Jïlleskuvline ektine soejkesjieh åarjelsaemien aalkoekuvsje 2. boelhke, 15 studijepoengh, geerve almetjidie gïjren 2021. Daate lohkeme gaajhkide mah sijhtieh åarjelsaemien lïeredh.
Aajege Saemien jolleskuvline ektine soejkesjieh «Åarjelsaemien bieliejaepieboelhke», 30 studijepoengh» skuvlejaepie 2021/22. Daate lohkeme gaajhkide mah sijhtieh åarjelsaemien lïeredh.
Aajege jïh Rörosen skuvle golme saemien gïele- jïh kultuvretjåanghkoeh öörnieh maadthskuvlen learoehkidie Røros-saemien dajveste fïerhten skuvlejaepien. Ovmessie aamhtese fïerhtene tjåanghkosne saemien learoesoejkesjistie.
Aajege göökte saemien gïele- jïh kultuvretjåanghkoeh learoehkidie jåarhkeskuvlesne böörie fïerhten skuvlejaepien. Ovmessie aamhtese fïerhtene tjåanghkosne saemien learoesoejkesjistie.
Aajege gïele- jïh kultuvren tjåanghkoesijjieh geerve almetjidie öörnie gusnie vætnoe våaroemisnie. Daarpoej mietie ovmessie vætnoekuvsjh, vætnoebiejjh jallh vætnoeiehkedh öörnebe. Saemien baakoeh jïh jiehtegh vætnoen bïjre aaj vihkele boelhke destie.